- banniere
- Banniere, ou Baniere, Vexillum, Signum. Aucuns estiment ce mot venir de Bann Allemant, qui vaut autant que feld, et signifie champ et consequemment fief, ou champ fieffé, et l'estiment d'autant que nul ne portoit bannieres anciennement sinon les Banneretz, Barons, Contes, Marquis, Ducs, Princes, Rois, et Connestables, Admiraux, maistres des Arbalestriers, et Mareschaux, jaçoit qu'ils ne fussent Barons ou Banneretz, et ce par dignité de leurs offices, et ne portoient que pennons, comme si nul gentil-homme sans fief de tiltre n'eust anciennement droit d'avoir bannieres. Mais il est plus prochain voisin de Baner ou Banner aussi mot Allemant, signifiant Vexillum, Enseigne, que de Bann. Aussi de Baner à Baniere, le passage en est plus court et plus aisé. Anciennement l'usage des bannieres estoit des gents de cheval: mais depuis que ces mots de Cornette et Guidon sont survenus, s'estant aneanty le mot de Bannieres parmy les gens de cheval, il a esté ravallé aux gens de pied, ce que monstre ce mot Bande, prins pour une compagnie de gens de pied, qui vient de Banniere, parce que chaque compagnie de gens de pied a sa Banniere particuliere. Aussi tant le Picard, que le Provençal, et le Languedoc, pour Banniere disent Bandiere. Ainsi que fait l'Espagnol aussi, disant Vandera, pour ce mesmes. Duquel le diminutif Banderole est encores usité entre les chevaux legers, et és ornemens des galeres, galions et navires. Mais lesdits gens de pied n'usent à present que de ce mot Enseigne, tant pour Banniere que pour Bande, c'est à dire, tant pour signifier le drappeau, que pour signifier la compagnie, estant demeuré ledit mot de Banniere en usage aux Eglises et processions, voyez Pennon.Aller contre ou sur aucuns à Bannieres desployées, est les aller combatre, leur livrer bataille, parce que se presentant l'occasion de la bataille, toutes les Bannieres sont desployées et mises au vent, pour l'ordonnance des compagnies, és bataillons et esquadrons, et du combat mesmes. Nicole Gilles en la vie de Philippe de Valois. Mais quand ceux de la ville sceurent sa venuë, ils s'armerent et allerent au marché. Et lors le Conte et Messire Robert de Fiennes vindrent contre eux à Bannieres desployées audit marché, et s'entre-batirent tres-bien, et y eut mout de gens tuez.Banniere de France, est celle qui est portée devant le Roy és chevauchées militaires, armées et batailles, Francicum Liliorum vexillum. Laquelle est semée de fleurs de Lys sans nombre, ainsi que l'ancien Escu des armes de France le fut auparavant l'an 1380. que Charles sixiéme les reduit au nombre de trois. Nicole Gilles en la Chronique dudit Roy, semblablement voulut et ordonna, que là où ses predecesseurs Rois avoient porté en leurs armes un Escu d'azur, tout semé de fleurs de Lys sans nombre, deslors en avant n'y eut que trois fleurs de Lys seulement.
Thresor de la langue françoyse. Jean Nicot.